| 高鐵 的个人资料網絡分享系統-網絡日記照片日志列表 |  工具  帮助 |
|
2007/2/25 CW23真係好失敗講真啊，其實我都係於昨晚先決定去CW，目的就係為了買兩本同人誌。
之前都聽了好多負面新聞，以為係外人亂吹，點知去到先發現，情況比預計的更惡劣...
首先排隊係要排出去街外邊，據聞龍尾曾經去到舊啟德機場！不過我因為有網友一早排隊，
可以打尖，所以大約三分鐘就可以買票入場，不過入了場之後，我只係覺得個場好迫，又好多人，
買了我想買的野之後，我就同班網友一齊兜場，但有某幾區係人多到完全無辦法移動...
所以我好快就行了出場休息，順便睇下正裝修中的國際展貿中心改了幾多野。
我發現佢的裝修工程非常全面，封了好多過往都係通道的地方，睇來佢好想將果度改頭換面...
另外我發現外邊冷氣係比裡面大，舒服好多...
而有好多Cosplay都將基地搬了上二至三樓，所以要搵齊佢地的話都好困難...
另外第二個唔多開心的事係雖然有好多Cosplay，卻絕大大多數出我唔識的動畫的人物(或者調番轉
睇，我識的動畫太少)，所以無乜心機影，最後只係影了7幅相就離場，係今年第一場失敗活動...
最後，就係同班網友去食下午茶之後，我就同佢地分開，自己行完淘○商場，企係車站影了三幅相
後就返屋企休息...
如果CW24仲係好似今年只用一個大場的國展搞的話，我可能唔會再去... 2007/2/21 西鐵免費開放日網絡分享系統祝各位年年有餘，學業進步，恭喜發財！
你地無睇錯標題，今日又係西鐵開放日(上次於2005年中)，所有乘客搭車都唔需要埋單~XD
而我亦在這時候搭車入屯門玩，今次比上次醒，行埋位於屯門站附近的商場，因為都係時間更新一下了~
雖然我都預了商場鋪頭未開無乜野睇，但我真係估唔到屯門站附近的商場十年如一日，無乜特別野睇...
之後，我就行了去影輕鐵，證明我今日係入過屯門，之後再去巴士裝配廠睇下有無乜野新巴士裝配緊，結果
見到的又係成堆B9TL...唔該唔好再買啦！唔悶架咩！就係講完呢句的時候，我發現廠後面停了部新的樣
版巴士(已經有N年無見過樣版巴士入口)，可惜佢停得太入，我只可以影到佢車尾...
行到巴士停車場，我又見到部被人「開罐頭」同食過「三文治」，現正重建車身的Trident，我記得近來相似
車禍之中就只係得ATR101(九巴第二部樣版Trident)係咁樣，所以我覺得果部係ATR101...
於屯門站錄完廣播後，我就行去友愛影輕鐵同接駁巴士，之後再返去南昌站，結束整個快樂的大西北之旅~
只不過關放開放日的相就無乜點影，因為同上次差唔多，而且我唔想影櫃位，費事又比人罵...
直得一提的係，我今次搭車，都係用免費車票的，因為我想試下破我張八達通的記錄，因為我張八達通已經
有兩年多未接觸過西鐵的閘機啦~XD 講講果張免費車票，佢係一張已停用的東鐵單程票，因為上次又係用同
一車票的關係，所以我以為閘機會係出閘時將車票收回，點知就係我於屯門站出閘時，張飛竟然彈番出來！
我嚇到立即縮手，因為彈票意味著車票失效，但立即有職員說「車票於一時前可無限次使用」，哦~原來呢張
單程票就是傳說中的半日票！所以到最後閘機都無收回車票，而張車票亦成為了今次開放日的記念品...
P.S.1 而我亦慶幸去櫃位拿車票搭車是正確的，因為係我走了之後南昌站竟發生免費乘車被扣車費事件...(汗)
P.S.2 結束大西北之旅後，我又到電腦商場睇Display卡價錢，但我發現目標卡真係好貴，我諗緊係咪係時間要
換底板去減輕購買零件的成本呢...OTL 2007/2/11 今日係馬鐵開廠日~我下午去到大圍火車站同網友會合後，就搭九鐵自家接駁巴士入馬鐵廠，不過車程就比去西鐵開廠果時耐
少少。
入到去之後，我地見到九鐵其中一件引以為榮的先進設備(列車檢查裝置)，呢套裝置可以於列車每天出廠前
就檢查到列車有無問題，以便及時修理，而家全世界係得九鐵有呢套自行開發的檢查系統。
不過係我將相機伸出鐵柵影相之時，突然聽到有列車響安，所以嚇到我立即收番部相機返來，就係我心諗邊
道有車來緊的時候，就有抽SP1950係果個檢查裝置下行過，當然佢唔係試用果個裝置啦，因為呢個裝置放了
係洗車機的前面，而果抽SP1950係用來玩洗車機的，所以佢就一定要行過果度...
但我地亦估唔到我地唔小心打了尖，插了入去其中一班參觀特定設施的人裡面，不過唔錯都錯了，於事我地
順勢跟了呢班人參觀車廠控制室了。
出番來之後，我就吸取上次參觀西鐵車廠的教訓，製作了一個優先參觀流程，所以就先參觀培訓中心，不過
就係參觀模擬大堂訓練設備的時候，竟然撞見落馬洲支線BVE的其中一位製作者(佢係認得我的~)，之後談過
一陣關於落馬洲支線BVE的事(整體來講果條線非常唔錯~)，而我亦係呢道再答應佢會幫他錄MLR用EB時的放
氣音。
臨走前，我地仲順路參觀了員工餐廳~(今日特別點，訪客可以係果度買野食)。
之後我地又上車參觀駕駛室同車底機器，而呢道的流程比西鐵果時仲快，只係用了10分鐘就可以參觀+影完所
有有關的野，只因佢用了生產線方式，無限量放人上車，但我除了影錶版同「裙下春光」之外，我都無乜點
影過車底機器，因為要影的已經係上次西鐵開廠時搞掂哂~XD
之後就係參觀洗車，雖然人數限制同上次差唔多，但因為抽車短(得4卡)，變了車上有好多人，而抽車亦都行
到去平時我地唔可能去到的調頭路軌盡頭先調頭返去洗車，而呢程車亦比西鐵開廠果時近，所以好快完，不過
落車果時就耐點，因為得一度門去疏人...
大家有無發現我地好成功咁參觀哂四大節目呢？(用藍色標示的字)XD
就係因為流程有效，所以我仲有時間玩多一個遊戲，係最後關頭拿到一個九鐵環保袋~XD
雖然抽獎無我份，但都睇得幾開心，因為都係果句，好多野都可以用手去接觸，例如集電弓頂部的碳條，剎車
片，列車裙板，票務處內的售票系統(呢個可以試玩，真係有車票出)，甚至可以將頭伸入路軌及車底近距離影
相(當然，我係安全的位置先影啦)，職員亦會根據訪客對鐵路系統的認知情度而調節講解內容，而且又講得幾
深入，我感到九鐵呢次開廠亦非常有誠意~！
另外值得一提的係，開廠日的接駁巴士雖然得四部，卻可以做到源源不絕的效果，要訪客等候巴士的原因全是
因為巴士要倒車調頭所致，比其他商場，住宅的接駁巴士行車密度都要高！
不過對我個人來講的美中不足，就係接駁巴士唔係派東鐵獨有的利蘭，而係同西鐵開廠一樣，都係派短Trident，
不過睇番現場環境，果度真係窄到要短車至行得，算吧！
當初我諗住九鐵唔會咁快開另一個廠，不過估唔到佢三個月內開兩次廠，呢個舉動真係令我跌眼鏡...
P.S. 如果要睇番我上次參觀車廠的過程，可以睇番呢編文~ |
|
|
