| 高鐵 的个人资料網絡分享系統-網絡日記照片日志列表 |  工具  帮助 |
|
2006/2/21 祝東急8000系B-Train入手！相信大家係琴晚都見到我係MSN寫住「整模型中，無事勿找」了~
其實係呢段時間我用緊超高速來組裝我的東急8000系B-Train，
總共係兩編成八卡，而我所買的兩編成當中，一組係8000系紅
帶車(即車頭有一條紅線)，而另一組係8000系更新車(更新車同
時又稱為8000系「歌舞技色」)。
不過計過條數之後發現好貴，所以經過詳細考慮之後，我決定
唔買真實車齡非常年輕的東急5000系，得過藍絲帶獎的
東急8500系，反而購買了真實車齡非常高，而且無拿過獎
的東急8000系。相信個個都問我點解我情願買車齡高的車都
唔買車齡低的車呢？就是因為我特別喜歡東急8000系個樣同
加速音。
至於東急8000系的歷史一點也不簡單的，因為它是全日本及
全球第一部使用界磁Chopper作為牽引控流器的列車，同時又可
以在減速時提供再生電力給電纜以給其他列車使用，另外現時多數
新型列車都會使用的「One Hand」式加減速杆，其實個設計都
是來自東急8000系的，雖然咁樣都唔太構成我鐘意呢抽車
的原因的，不過我聽埋列車的最初製造日期後，我就真係愛
上了它！因為它的最初製造日期竟然是1969年！(1969年的香港鐵
路都只係用緊柴油機車行，十年之後的香港地鐵先至出現
全港第一部用界磁Chopper的列車出現)，另外我真係唔相信有技術
居然可以係果個年代出現，例如「One Hand」式加減速杆就係
了，所以到了而家，雖然東急8000系的年事已高，東急都要係2007年
將所有的8000系廢車，不過呢抽車的設備仍未同呢個時代
脫節。
而我買果兩抽東急8000系B-Train，其實係代替買唔到真正
的東急8000系模型而買的~XD"
因為東急8000系模型太貴，要$1000-$2000先有可能買到，相
反我而家買的東急8000系B-Train，優點係平，雖然完成品係Q版
來，不過勝在細部夠可愛，而抽車的車頭同車廂都造得幾
真，而且只要購買KATO的專用動力台車的話，它一樣
可以在所有N-Gauge模型路軌上使用控制器行走，同真
正的模型無異！我真係想期待呢一日的來臨呢~XD
至於我整好了的果兩抽東急8000系，將會全數投入於珍珠市營鐵道
Pitch Line及Pure Line上，想試搭的話就好快點啦~XD
P.S. 至於關於果兩抽東急8000系的相我會盡快上載到網絡分享系統的~ 2006/2/14 各位情人節快樂今日係情人節，祝有情人的人快樂~XD
而我亦準備了兩條問題同答案比大家以解答一些關於我的問題~XD
高鐵你找到你的情人未啊？
我到而家都仲係去死去死團的成員之一，不過好彩仲未收
過好人卡~XD 有人問我點解唔重動出擊呢？因為以我而家的
財政預算及資源根本就供唔起一個女朋友，而且我都係想
等Pitch完了先至開始搵，始終有個籍口同自已講由莉已
死，無謂再記掛她了~XD (謎之聲：你小心比由莉打死啊！)
咁高鐵你今日做了乜野？
我今日就去了九廣東鐵沿線來捉住X2000來影，因為我發現
我影過的相之中，X2000的相係非常之少，就算有都唔適合
放出來比人睇，所以我就係琴晚抄底直通車出發同到站時
間，來預計列車在中途站出現的時間，之後去影車位置
一流的車站等抽車來影！結果我就選擇去大學站往羅湖方
向的車頭影了，不過可惜我遲到(因為我預計抽車會係我到果個站
之前就通過了該站)，不過估唔到抽車仲遲過我來，而且等等下又
落雨，天色灰暗，除了不便影相外仲可能會整壞部機，所以我
決定更改等候位置，去大圍站影相，結果等了一班SP1900之後
就到X2000通過了，咁我緊係把握機會影相了，結果係幅相
差點炒，不過好在無事~
影完呢幅相之後我發現仲有20多分鐘就超過乘車限時要罰款
($500)，所以我就搭車去沙田出閘，順路係返工返學少人行街的
時候行下商場同等X2000係紅磡站出發再影過，結果想睇的
鋪頭未開，唔太想睇的鋪頭又無乜人(我強調係職員比顧客
多)，等到差唔多的時候我就再入閘，再搭車去大圍站南行月台
等抽X2000來，結果等了一抽南行SP1900同一抽南行MLR列車後，北
行線終於出現X2000的終影啦！我立即提起相機再影，結果兩
幅相我都好滿意，因為個車頭都好清~XD 不過我呢個時候又去了北行
線月台，因為係十多分鐘後南行線會有抽Re465行過，佢的相我
都唔係好夠...
等了十幾分鐘之後，我見到Re465用龜速通過大圍站，到適合的位
置時我按快門掣... 竟然炒相！我唔相信自已係抽車咁低速行車
的時候影相居然都可以炒相！OTL 我想影車尾補救，不過影完
之後我發現都係救唔番果幅炒相，因為呢抽Re465居然係無尾
的！(但同時無尾的Re465都係香港鐵路特見之一)，不過咁~ 今日的
主菜係X2000，Re465只係甜品，而且今日有雨，天氣唔好，所以我
都無介意過乜野，但我介意有部份東鐵司機係度玩車，玩到抽車
的拳動令我好唔舒服。
OTAKU豆知識
去死去死團：即閣下無女朋友的話就會自動加入的網絡團體。
好人卡：即向女方示愛時被女方拒絕。
由莉已死：在Pitch 52話，因為Dark Loves全體成員同加克特一起沉落深海，
之後死亡，所以在Pure 1話起(Pure 39話除外)所有有由莉出場的集數，由莉
其實都只係靈體來。
P.S.1 原來直通車只有出發時間係真的，到站時間永遠都唔準，全因廣深高
速鐵路的時間表寫得差有關...
P.S.2 X2000同Re465的日本近畿製車廂將會放上網絡分享系統裡 2006/2/7 澳門三日行程係四日之前我過了去澳門玩，因為香港實在太悶，係時間出
去第二度玩下同見識下~
2月3日
我0700左右就起了身，做完整理之後就準時係8點出門口，搭地鐵去港
澳碼頭，等埋親戚之後就出境，而今次出境有別於平時，因為今
次係我第一次使用e道出境，話時話又真係好快喎，10秒都唔洗
我就已經係香港消失了~XD (因為我已經被入境處確認離了境)，不
過因為我有個親戚因為係坐輪椅，而我媽媽亦需要照顧佢的關係，所以
我就跟住媽媽經特別通道上船，而我亦係頭3個上船的人來~XD
我乘搭的船係TXBRO JET的祥星號，時速50海里。
隻船係0931出發，1033到到了澳門新港澳碼頭，一落船就再跟住媽媽經特
別通道入境，今次唔同香港，我除了可以明正言順咁打尖入
境之外，仲唔需要經過體溫探測呢~XD 不過因為其他親戚係使用
普通通道入境，所以我都係企了半個鐘左右先等齊人，再出碼頭等
酒店接駁巴士去酒店，到了1130左右終於都到了皇○酒店
了，不過拿房時才發現還有三間房未整理好，所以未有鎖匙
卡(到了夜晚已經整理好)，不過可以將行李放係其中一間房先，放
完之後就去食午飯。
行了1個鐘左右就去到萄京酒店食午飯，食了個多鐘頭之後就搭萄
京賭場的接駁巴士去新港澳碼頭，之後行去魚人碼頭，不過因
為要等多兩個親戚來的關係，所以就係呢道一路食野一路等，不過
呢道的野都好貴，一食就食了$200左右，但都只係零食來...=.="
等到1630左右，親戚就來到澳門同我地會合了，過多半個鐘我地就行去新港
澳碼頭搭澳巴10A號線(巴士編號H25)去媽閣，不過部巴士的波箱
怪怪地，整段行程有怪聲出現，我親戚話呢部車遲早壞，而且條
線原來係兜路行，初初就唔多人，不過搭到近新馬路的時候部車就
勁多人，去到媽閣之前幾個站先少番人... 不過用了成個鐘頭去搭
一條我認為15分鐘已經可以行完的巴士線，去到媽閣廟人地都
已經關了門的關係，所以就去食晚飯了，晚餐係食萄國菜，不過
用了差唔多成千蚊去食，都好貴...@@"
之後就係行番去酒店，中途經過新馬路，買了點手信，大
約2200左右就返去酒店房了，不過休息了一陣之後媽媽就叫我落賭場
玩，佢仲話來到澳門唔賭唔得，所以我就跟了佢落賭場賭錢
了，初時我比部角子老虎機玩，比佢拿了我$60走，不過後來我又
係賭大小的機度收服番$60返來，結果我只係輸了$40乍~XD
係我玩完賭大細的時候，職員主動上前問我地需唔需要飲
品，仲係要乜有乜，無限供應及唔收貼士呢~ 所以我就叫
了杯熱奶茶飲，味道好似M記的奶茶，唔錯！
係2245左右就返到房，沖涼同睇香港的新聞，睇了一個鐘，去到0011的時候
我就寫埋酒店附近的巴士線同路線內容之後就睡覺了。
P.S.1 我對於自已在未熟悉地方的認路能力越來越有信心，因為我第一次行
就認得返酒店的路係點行，仲識得帶人行捷徑返去呢~XD
P.S.2 我而家先發現原來東鐵尖東站有暗斜，居然會有列車可以係站內滑動...
2月4日
我係0820起身，整理一會之後就睇香港新聞，睇完之後就落街影巴
士，因為呢個係我來澳門的其中一個目的，結果都唔錯，一口氣就
影了好多巴士，仲影到今次最想影到的巴士-日野RAINBOW添
~XD
到了1000左右就返房休息一陣，之後再出發，係1010左搭日產的士去媽閣廟
同海事博物館參觀，係落車的時候因為發現昨晚好難找的士，所以
就問了司機一些搭的士的問題，亦都拿到重要的答案。不
過係玩之前就去了食早餐先，係1100先正式去媽閣廟上香同去海事
博物館參觀，1230左右就去食午餐，今次係去一間茶餐廳食
萄國餐，叫的菜同琴晚差唔多，不過就平好多了，走之前我又影了
點巴士相~XD
係1345就搭豊田CORONA的士去位於大三巴的澳門博物館參觀，之後
我就自已去了大三巴影了幾幅相，就跟大隊搭日產的士去賽車博
物館，場內所有的賽車我都影過，但可惜玩唔到佢條
東望洋賽道，因為佢部電腦係聖誕節死了機，到而家都未整...OTL
之後就行去法老皇賭場參觀下，不過原來入場要入會先，所以我
最後都係無入去睇，之後就再去魚人碼頭搵野食，而今次終
於都發生意外，就係我影相的時候成班親戚竟然放低我一
個！雖然我可以返酒店，不過有點唔甘心，所以就用廣播搵媽
媽，不過無人聽到，所以最後我聽魚人碼頭職員的建議去打
IDD搵人，結果知道原來佢地係入了餐廳食野。係有人搵過我，不
過可惜的係佢只係企係餐廳門口等而無返去原來唔見人
的地點搵我，搞到我係果度等了成個鐘...=.="
2000左右就去番新港澳碼頭搭接駁巴士返酒店，不過之前我同媽媽就去了
新八佰○睇下有乜賣，結果真係令我不斷咁講粗口，因為貨
品種類少同貴之外，遊戲機方面仲居然只係得GBA賣，唔
係麻！最好笑的係佢係澳門地圖上賣的廣告居然仲寫住「未來過新
八佰○點算係來過購物天堂」...
之後我地就繼續行去新港澳碼頭，途中見到魚人碼頭的火山噴火呢~ 不
過行到去新港澳碼頭的時候，尾班接駁巴士已經開出了(睇個死
人樣佢仲因為無人，所以無行到果程就返停車場)，不過我地又
唔知，所以係個車站等了20幾分鐘，後來見無車到就放棄
等，改為搭的士返去，之前我仲快快手跑去賽車場個Pit到影了
三幅相同睇下條終點線係點樣的~XD 之後又快快手跑番去
的士站同媽媽搭豊田CORONA的士返去酒店。
到了2200，終於都返到酒店，媽媽就同親戚落去賭場賭錢，至於我就沖涼，
睇澳門新聞，香港播的鋼練同睇完香港新聞之後就睡覺了。
P.S.1 雖然係慢了點，但我覺得我諗野的速度越來越快同越來越準確，因為
係唔見了人而無帶電話的時候我諗到應該要點樣處理。
P.S.2 係呢日我媽同親戚講番琴日我失蹤的果件事時，親戚話我無帶電話有
錯，不過最錯的係我媽媽，因為佢教我要係原地等，但又無返轉頭搵我，
所以有親戚企係我果邊呢~XD P.S.3 係呢日我地的特首就去了九廣東鐵何東樓車廠參觀，唔知九鐵主席啊
田生又幾時去參觀呢？XD
P.S.4 由下個星期開始，銅練應該會好好睇的~XD
2月5日
我係0830就起身，整理完之後就係0900落去食早餐，不過只係食了兩
碟野，我想食奄列的，不過食唔落呢... 之後就上番房拿野之後
就快快手去搵下全澳門第一條，亦可能係最後一條的有軌
交通線 - 松山纜車(其實係吊車)，不過呢條線真係短得可憐，仲要
收$3先搭得...XD"
再影了一陣巴士之後，就係1020就搭日產的士去路環的小型賽車場玩賽
車，真係好有速度感，仲要不斷係咁玩Slow In Fast Out！之後
不斷以極限速度來轉灣，感覺真係超正！不過賽道上同街道上
感覺係完全唔同，所以我係絕對唔會被打亂而胡亂咁駕駛車
輛的！
係1100左右就係賽車場搭豊田CORONA的士去仔的文化區參觀下萄國
人的住屋同離島歷史，之後就行去官也街食午餐，食完之後就買手
信，不過佢地都買了好耐，去到1530左右先買完，之後搭日產的
士返去酒店放低手信，係1620再去食甜品，不過果間野其實係香港
都有分店的...XD"
返酒店拿番所有野之後就搭接駁巴士去新港澳碼頭搭船走，去到碼頭都
已經係1745了，所以就搵下有無船搭，雖然人多(10人)，不過都可以
搭到係1800開的船，所以我地就立即出境了，初初我係用特
別通道的，但過了出境櫃台之後又比船公司的人阻住唔
用得，所以就要用番一般通道行入船，我只係記得隻船係TXBRO
JET 2006號，裡面的設備比較新。隻船係1803左右開出，1819收唔
到澳門電視台所發出的信號，1830電話由澳○電訊變成中○移
動，不過係4分鐘後就變番做SXNDAY了，1850就收到香港電
視台的信號同見到堅尼地城的建築物，1904隻船就停了係港澳碼
頭度了。我經e道入境之後就等齊所有人，之後係的士站解散，我同媽媽
搭地鐵返屋企了~XD 不過因為隻船係航行時好搖，所以我好暈，等
了半個鐘左右先落去東鐵旺角站增值同去KXC買晚飯...XD"
P.S.1 原來係澳門學車用的車，連左邊師傅位都有軑盤架！呢樣香港真係要
學下啦！XD P.S.2 總結三日行程，我發現我的親戚真係好鐘意食野，成日都停係度食野
而拖慢行程呢...=.="
豆知識
1)係澳門盡量行得到就行，因為澳門唔係好大，而且城市規劃不好，道路負
荷過重，所以成日塞車，其實行路都可以去到好多景點，可能仲會快過你搭
的士同巴士架！
2)盡量係景點找的士或者預約定一部的士等你，因為澳門的士非常少，另外
一落完客就立即有第二個客人上車，遲一步你都找唔到！另外仲有絕招，就
係你預約的士時，講明找數時會比原價比多$20或更多的時候，一定會有大
把的士爭住接你！此情況於長程線(澳門去仔或路環)更加明顯。
3)盡量唔好搭巴士，除非你搵唔到的士或好累唔想行，因為巴士係兜路行
的，有咁多條街就兜足咁多條街，好浪費你的寶貴時間。另外巴士得三個價
錢，$2.5(澳門區內)，$3.3(澳門去仔)同$5(澳門去路環)
4)善用酒店接駁巴士，基本上好多酒店係唔會理你係咪該酒店的住客，所以
你可以去就近的酒店搭接駁巴士去新港澳碼頭，好過你搭的士同巴士。
5)澳門的旅遊巴士大多數都係左軑的，主要原因係澳門容許左軑巴士係澳門
登記，而左軑巴士比較平，所以吸引到好多旅遊公司買。
6)參觀博物館時買張博物館入場證啦，只係$25，買了之後你可以係5日內入
6間政府博物館各一次，每間博物館的入場費都係$10，所以入三間博物館就
已經回本了。
7)澳門的五星酒店同香港的五星酒店定義係兩回事，佢五星的定義其實只係
我地三星的標準，我最多比到四星！
8)澳門的人都唔係太守交通規則，所以過馬路要小心點，另外交通警嚴重不
足，係巴士站居然可以泊滿私家車，唔比私家車入的地方就居然有私家車偷
雞進入等等。
9)澳門的士多數只可載四人(豊田CORONA)，有些就可以載五人(日產)，另外
仲有三隻的士的，不過我見唔到，所以唔知載客量係點。而大多數的士司機
手車係唔多掂，可能會令你坐得唔舒服。
10)魚人碼頭的火山內的機動遊戲自發生意外之後就一直關閉了，只係得番
比細路玩的機動遊戲同埋鋪頭(不過未開齊的)，所以盡量唔好去啦，因為去
了的話你會後悔~
11)由於澳門好多車都用了十幾年，包括巴士，的士，電單車等等，所以廢
氣特別多，無事就唔好企近部車了。
12)澳門的所有政府建築物所使用的電樓梯同電梯都係清一色OXIS，型號亦
都係一樣，仲要係香港分公司同佢安裝呢~XD
13)大多數位於景點的公共廁所的衛生情況都只係一般，有部份極出名的景
點的公廁衛生環境甚至係惡劣(不過無異味)，比香港差少少，所以要做大事
的話最好返酒店，私人地方或需要比錢入場先用到的廁所先好做。 2006/2/1 昨日發生了件我覺得會係動漫內先會發生的事各位恭喜發財！我先祝大家學業進步，身體健康，萬事勝意，如意吉祥！
入番正題~
反正我係屋企Online，網友只會當我係隱形的，咁不如就應某網
友的約晚上入去佢位於大埔的屋企玩好過(好老實講我好少係晚
上入大埔的，反而出大埔就好多次)，至於平時其實我都有入大埔
玩，不過只限去鐵路博物館潮聖或者係大型商場行下，今次係
第一次入大埔係為了上人屋企玩。係車站等他接我之後就先上
佢屋企集合，順路參觀下佢的屋企，佢屋企都唔錯架…(此部
份文字已加密，用戶無法查看)，到集齊人之後我地就行去大埔舊墟
吃晚飯，而我今次食的晚飯是有人請客的~XD
食完飯之後我地就再一次返去他的屋企，之後就睇了套電
影，睇完電影之後他們就因為睇電影而突然心血來潮，所以就開
了副麻雀來玩，不過我係唔識打的，所以就係呢個時候我就問他
麻雀點樣玩，但可惜當佢想教我的時後卻發生了一件影響
了全部人心情，卻和我無關的事，件事其實係咁的…(此部份文
字已加密，用戶無法查看)，我覺得我看到的情節應該只會係動漫
內發生才對... 不過我係第三者，所以我唔會為今次的事件作
評論。
由於要趕搭尾班車，所以我係2322左右就叫網友送我去車站，當他送
了我去車站之後我就搭車返來，結果一上到月台就真係見到尾班
車！不過果班係去羅湖方向的尾班車~XD(由於羅湖關口於0000-
0600之間關閉，所以往羅湖的最後一班列車會在2310左右由尖東
站開出，以趕及於0000之前將要過關的乘客送到羅湖。至於過了
呢個時間之後唔代表無車搭，因為全部列車都會以上水為
終站，直至0030收車停止服務為止)，至於我影完果抽做羅湖尾
車的SP1900 D223F之後，我就搭去尖東的MLR列車返來
了，同平時相比，人流非常的少，基本上可做到一定有位坐及
可選到自已鐘意的位來坐，搭到返來旺角時都已經係年初
四了...XD"
P.S.1 係上網友屋企玩的時候我問他借了兩套動畫，共三盒來睇，今晚剛剛
睇完第一盒，我發現真係唔錯喎！佢的眼光真係好，而我的眼光都唔錯~XD
P.S.2 唔知最近係咪多了野睇，所以最近都唔係太留戀上網同人談天同睇
Pitch，尤其係無○無改到Pitch的OP同ED之後，此情況越來越明顯... |
|
|
